“İraq Olsun” jurnalist Zakir Sadatlının İraq səfərindən sonra qələmə aldığı bi səyahətnamədir. 144 səhifədən ibarət kitabda Z. Sadatlı İraq səfəriylə bağlı xatirələrini, Türkmanlarla bağlı düşüncələrini bir araya toplamışdır. Kitab 2012-ci ildə “Qanun” nəşriyyatı tərəfindən çap olunmuşdur. Bunu da qeyd etməliyik ki, Zakir Sadatlı Qəzənfər Paşayevdən sonra İraq Türkmanlarının həyat tərzi, siyasi və ictimai həyatından bəhs edən əsər qələmə ilk yazıçıdır.
Şair, senarist, publisist, tədqiqatçı və yazıçı Aslanov Zakir Emin oğlu 15 may 1961-ci ildə Azərbaycanın Cəlilabad rayonunun Sadatlı kəndində dünyaya gəlib. 1978-ci ildə orta təhsilini başa vurduqdan sonra 1979-1981-ci illər arasında Əfqanıstanda hərbi xidmətdə olub. 1982-1987-ci illərdə Azərbaycan Dövlət Pedaqoji İnstitutunun Filologiya fakültəsində təhsil alıb. Məzun olduqdan sonra Bakı şəhəri 1 nömrəli orta məktəbdə çalışmağa başlayıb.
Ermənistan-Azərbaycan 1-ci Qarabağ müharibəsi (1990-1993) zamanı Qarabağda ön cəbhədə vuruşub. 1993-cü ildən 2010-cu ilə qədər Azərbaycan Dövlət Televiziyası və Radiosunda “Hərbi vətənpərvərlik və salnamə” redaksiyasının baş redaktorluğunu edib. Daha sonra Azərbaycan Radiosunun “Gənclik və idman” redaksiyasında baş redaktor müavini vəzifəsində çalışıb.
Azərbaycan Yazıçılar Birliyi (2005) və Avrasiya Yazıçılar Birliyinin (2006) üzvü olan Zakir Sadatlı ədəbiyyatla kiçik yaşlarından maraqlanmağa başlamışdır. 1983-cü ildən etibarən ədəbi-bədii yazıları respublika mətbuatında dərc olunan şairin ilk mətbu şeirləri – “Karvan”, “Kamillik məsafəsi”, “Dəşti” Cəlilabad rayon qəzeti “Yeni gün”də dərc olunmuşdur. Sonrakı illərdə şeir və onlarla publisitik məqalələri müxtəlif mətbuat orqanlarında çap edilmişdir.
Şair və yazıçı Zakir Sadatlının əsərləri Azərbaycanda “Azərbaycan”, “Ulduz”, “Füyuzat” jurnallarında, eləcə də Türkiyədə nəşr olunan “Qardaş qələmlər”, “Türk ocağı”, İraqda “Qardaşlıq” dərgilərində, eləcə də “Hürriyyət” qəzetində işıq üzü görmüşdür. “Aydınlıq”, “Gündoğandan-Günbatana” başda olmaqla, 20-dən artıq filmin ssenarisini yazmışdır. Bu filmlər əsasən müharibə və vətənpərvərlik mövularında idi. Zakir Sadatlı, eyni zamanda, Azərbaycan Xalq Cümhuriyyəti dövrünün görkəmli araçdırmaçı-tədqiqatçılarından olmaqla yanaşı, Cümhuriyyət inqilabından bəhs edən onlarla tədqiqat-məqalənin müəllifidir.
2008-ci ildə Z.Sadatlının “Salam, baça” hekayəsi Mahmud Kaşğarinin doğumunun 1000 illiyi çərçivəsində YUNESKO-nun 24 türkdilli ölkənin yazıçıları arasında keçirdiyi ədəbiyyat müsabiqəsində 1574 əsər içində üç qalibdən biri olub. Əsər Azərbaycan üzrə 1-ci, Türk dünyası üzrə 3-cü yeri tutub. Bu əsər alman, ərəb, qazax, rus, tatar, türk dillərinə də tərcümə edilərək çap olunub.
