İÇƏRİŞƏHƏRDƏ İRAQ-TÜRKMƏN MİLLİ GEYİMLƏRİ TƏQDİM OLUNUB
Press-reliz/Noyabrın 2-də İçərişəhərdə yerləşən Leyla Əhmədova Yüksək Moda Muzeyində İraq-Türkmən milli geyimlərinin təqdimat mərasimi keçirilib. Tədbir çərçivəsində İraq türkmənlərinin geyim irsini əks etdirən eksponatlar Azərbaycan Respublikasının Prezidentinə və Birinci vitse-prezidentinə hədiyyə olunmaq üzrə muzeydə nümayiş etdirilib.
Kərkük Mədəniyyət Mərkəzinin təsisçisi və sədri, şair-yazıçı dr.Şemsettin Kuzeci ilə modelyer-dizayner Leyla Əhmədovanın təqdimatında baş tutan tədbirdə Beynəlxalq Avrasiya Mətbuat Fondunun prezidenti Umud Mirzəyev, kulturoloq, professor Fuad Məmmədov, Aşıq Ələsgər Ocağının rəhbəri Xetai Ələsgərli, Əməkdar artist Elza Seyidcahan, ictimaiyyət, media və mədəniyyət nümayəndələri iştirak ediblər.
Tədbirdə çıxış edən Leyla Əhmədova İraq-Türkmən geyimlərinin bədii xüsusiyyətlərindən söz açaraq bildirib:”İraq-Türkmən mədəniyyəti ilə Azərbaycanın geyim irsi eyni kökdən bəhrələnir. Nümayiş etdirdiyimiz hər bir naxış və toxuma əsrlər boyu qorunub saxlanılan ortaq tarixi yaddaşımızın göstəricisidir. Bu geyimlərin cənab Prezidentə və vitse-prezidentə hədiyyə olunması mədəni bağlarımızı daha da möhkəmləndirən mühüm adımdır”.
Kərkük Mədəniyyət Mərkəzinin sədri Şemsettin Kuzeci Kərkük ilə Azərbaycan arasındakı mədəni əlaqələrdən danışıb: “Kərkük ilə Bakı arasında qurduğumuz mədəniyyət körpüsü hər zaman xalqlarımızı birləşdirib. Bayatılarımız, dilimiz və geyim mədəniyyətimiz birdir. İraq türkmənlərinin milli dəyərlərini Bakıda, dövlət rəhbərliyinə hədiyyə olaraq təqdim etmək bizim üçün böyük şərəfdir”.
Beynəlxalq Avrasiya Mətbuat Fondunun prezidenti Umud Mirzəyev türk mədəni irsinin təbliğindən danışaraq deyib: “İraq türkmənlərinin tarixi-mədəni irsi Avrasiya coğrafiyasının ayrılmaz hissəsidir. Bu cür təşəbbüslər xalqlarımız arasında mədəni inteqrasiyanı dərinləşdirir və ortaq dəyərlərimizin təbliğinə xidmət edir”.
Kulturoloq, professor Fuad Məmmədov isə eksponatların kulturoloji əhəmiyyətinə toxunub:
“Milli geyim xalqın təfəkkürünü və tarixi yaddaşını özündə daşıyan mədəniyyət kodudur. İraq türkmənlərinin geyim irsinin Bakıda təqdim olunması Türk dünyasının mədəni inteqrasiyasına və Azərbaycan-Kərkük dostluğuna verilən qiymətli töhfədir”.
Sonda tədbir iştirakçıları nümayiş olunan geyimlərlə yaxından tanış olublar.
