Yet Dadına Bu Dünyanın, Ay Allah!
Yaxşı-yaman bir ölçüyə biçilib,
Əyri-düzə, düz- əyriyə tikilib,
Quru əppək qəhət olub, çəkilib
Yet dadına bu dünyanın, ay Allah!
Əfi ilan üzübəri sürünür,
Qaçan qaçıb, mağmın hələ düşünür,
Bazarı bol, meydanı gen zalımın
Yet dadına bu dünyanın, ay Allah!
Haqq üzülüb, divan əyri qurulub,
Dili gödək əli uzun olubdur,
Gedən gəlib? Yoxsa dünya boşalıb?
Nə hay- küydür?
Yet dadına bu dünyanın, ay Allah!
***
Hardasan…
Bir yaz görüm necəsən?
Yarıcanım hardasan?
Sağım, solum, bütünüm,
Sənsiz elə darıxdım.
Dolanıram başına
Dörd divarın səhərdən.
Gələn-gedən nəfəsim
Yenə səssiz pıçılda
Gecənin qulağına.
Səni çox istəyirəm,
Mehribanım, əzizim.
Yatmamışam gecəni
Oturub səhərəcən
Adını zikr etmişəm
Dilim ucu qabardı.
Səhv-düz, tələm-tələsik,
Qara-qura eybi yox.
Eləcə yaz ki, sağam.
Canım, gözüm, əzizim.
Bağışladığın güzgü
Əlimdən heç düşməzdi.
Dünən salıb qırmışam,
Topalayıb yığmışam,
Bərk sıxıb saxlamışam
Ovucumun içində.
Qorxuram küsər, gedər
Bir ömür xatirələr…
Ayım, günüm, əzizim
Yarıcanım hardasan?
Köhnə şəhər, dar küçə
Külək, sazaq, dörd divar.
Yolun hansı yanadır?
Ordan boylanım sənə
Sağım, solum, bütünüm
Yarıcanım hardasan?
***
İki damla göz yaşısan
İki damla göz yaşısan
sıxsam gözlərimi dənizə
gəmilər boğulacaq
balıqların donu daralacaq
dərya yetim ayrılıqlar doğacaq
həsrət-həsrət baxışlar boylanacaq
küçələrin gözlərindən.
Qəhər tıxanacaq boğazına
yosunlar dolaşıq düşəcək
telləri əlçimlənəcək dalğaların
qağayılar sərgərdan olacaq
özgə ellər Vətən olmur
qaçqın uşağa.
Vətən yarımır naxələfdən oğul doğanda
noğullar kəsərsiz olur
oğullar fərsiz olanda.
Arılar bal yığammır
çiçəklər solanda.
yağış ol, ələn üstümə
quruyum …günçıxanda.
Pəncərəsi qırıq küçələr
Pəncərəsi çiliklənib küçələrin
O tay, bu tay.
Çölə tökülüb,
üşüyür, evlərə doluşur
pəncərəsi qırıq küçələr..
inildəyir yarası dərin olanlar,
dalanlara, döngələrə qısılır,
qaçqın, köçkün, qərib olanlar.
O tay, bu tay olanlar
Hamısı bizim olanlar
körpə, cavan, ahıl küçələr
bizim küçələr…
pəncərəsi qırıq küçələr..
***
Bu yağış ondan danışır
Bu yağış ondan danışır…
darıxır…
nəfəsi tərlədir pəncərənin şüşəsini
kül qabısı küllənib,
qalaqlanıb kötüklər…
Çəkən deyildi axı?
Həsrət çəkir…
siqaret kağızına bələyib ayrılığı külləyir
çayı soyutmur daha
qaynar içir yana-yana.
Səni qınamır daha
əzizləyir şəkillərdən…
yağışı çətir tutub,
evdən o dar küçəyə dönür…
qupqurudur…
bir damcıda dammayıb,
yağışdan bu küçəyə.
yazır oxunmamış mesajların ardına
…..mənə nəfəssən
nəfəs!
Sənsizəm
Sənsizəm….
Adını yazmışam nəlbəkimin arxasına
İsti saxlasın çayımı.
Qurutmusan Allahın göz yaşını
daha bizə yağmır yağış…
Dolu tökür, ardıncada qarlayır…
Soyuq olur evimiz.
Adın isidir istəkanı qucaqlayan əllərimi…
Yuxumda yenə oxuyurdun…
“Təbrizin küçələri dalanbadalan”
Qaragiləm, gəl silim gözün yaşın
bəri dolan!
***
Yolumun üstündə çiçək bitirdin
Bütün çiçəklərdən çox sevdim onu.
Adımı çiçəyin adına qoydun
Çox sevdim adımı, çiçək adında.
***
Tərsinə geyinmişəm əynimi
başıhavalı.
ayaqyalın dolanıram küçəni o baş, bu baş
qarhavasında…
şaxta kəsir ah-naləni
cınqırım belə çıxmır…
Sən üşüyürsən?
Külək sovurur məni…
Qovuşsaq bir VƏTƏN olarıq.
***
Sən hardan biləsən?
Sən hardan biləsən….
Küsüb öz-özünə barışmaq nədir?
Susmaq…
danışmamaq nədir?
Özünü yada salmaq
təkrar-təkrar yazmaq, pozmaq
ürəyi durmamaq nədir?
Yerdə göylə, göydə yerlə əlləşmək
Sevmək, sevmək , sevmək nədir?
Allahın evində birdən…
Səndən darıxmaq nədir?
***
Yalan
Ayaq tutar yeriməz
Ayağı var yalanın.
Yalandan düzəltdiyi
Yalanı var, yalanın.
Həqiqətdən gen düşən
Lap ağı var, yalanın.
Bozu var, qarası var
Doğrunun mayasından
Oğurlanan parası,
Öldürən həqiqətdən
Yaxşısı var yalanın.
Təzə eşitdim bunu
Təzəsi var, təzəsi.
Yallı yalan dedilər,
Yallısı var yalanın.
Əl-ələ, qol-qoladır,
Sarmaş-dolaşdır yalan.
Yaman meydan sulayır,
Meydanı gen yalanın.
***
Bu gecə yuxumda bir uşaq ağlayırdı…
Bu gecə yuxumda bir uşaq ağlayırdı,
Əlləri xınalı, telləri qıvrım.
Can deyib, haray çəkirdi.
Harayı dağ çəkirdi.
Gözündən od tökülürdü,
Alışıb, yanırdı dünya!
Bu gecə yuxumda bir uşaq ağlayırdı,
Əynində qırmızı don, ayağı yalın.
Don vurmuşdu ayağını,
Ünü ərşə çatırdı.
Diziüstə çökmüşdü
Səcdədən qalxırdı, dünya!
Bu gecə yuxumda bir uşaq ağlayırdı,
Xocalıdan…
Gəlinciyi qucağında.
Cəsədi qar içində.
Yiyəsi ölmüşdü,
Ortalıqda qalmışdı, dünya!
***
