“İraq mətbuat tarixi” kitabı ictimaiyyətə təqdim edildi və İraq türkmanları soydaşlarımızla əməkdaşlığın genişləndirilməsinin vacibliyi müzakirə olundu.
Regional Hüquqi və İqtisadi Araşdırmalar İctimai Birliyinin təşkilatçılığı ilə “Azərkitab” Kitab Təbliğatı Mərkəzində “İraq mətbuat tarixi” (1869-2019) kitabı təqdim edildi. Tədbiri giriş sözü ilə açan Regional Hüquqi və İqtisadi Araşdırmalar İctimai Birliyinin İctimai Birliyinin sədri Arzu Bağırova İraqın Azərbaycan üçün dost ölkə olduğunu bildirdi. O, öz fəaliyyyəti ilə iki ölkə arasında dostluğa töhfə verən dəyərli ziyalı, bir çox kitabların müəllifi, doktor Şəmsəddin Kuzəçinin kitabının nəşrini həyata keçirməkdən və ictimaiyyətə təqdim etməkdən məmnun olduğunu vurğuladı:” Tarixən İraqla hər zaman yaxın əlaqələrimiz olub və bu bu gün də ziyalılarımızın simasında davam edir. Bu cür tədbirlər əlaqələrimizi daha da möhkəmləndirir, Azərbaycanı İraqa, İraqı Azərbaycana daha da doğmalaşdrır. Professor Qəzənfər Paşayevin “Altı il Dəclə Fərat sahilində” kitabı bizə İraqı daha çox sevdirən və tanıdan kitab kimi bu gün də sevilir və oxunur. Ümid edirik ki, təqimatına toplandığımız bu kitab da ictimaiyyət, xüsusilə də media nümayəndələri üçün maraqla qarşılanacaq.”
Kitabın müəllifi Şəmsəddin Küzəçi bildirdi ki, kitab gərgin araşdırmalar, uzun zaman ərzində ərsəyə gəlib. İstər İraqda, Kərkükdə, istərsə də Türkiyədə jurnalistika fəaliyyəti dövründə apardığı araşdırmaların nəticəsinin kitabda toplandığını qeyd etdi. İraq türkmanlarının və Azərbaycan xalqının eyni soydan gəldiyini, ortaq mədəniyyətin, dilin, folklore malik olduqlarını xatırladan müəllif Kərkük xoryat və manilərinin Azərbaycanda da məşhur olduğunu, azərbaycanlı sənətkarlar tərəfindən sevilərək ifa edildiyini qeyd etdi. Kitab müəllifi tarixin müxtəlif dövrlərində İraq mediasının keçdiyi mərhələlərdən söz açdı, bütün dövrlərdə jurnalistlərin cəmiyyətdə baş verən hadisələri işıqlandırmaq istəyi və mübarizə əzminin olduğunu vurğuladı. İraqın Azərbaycandakı fövqəladə və səlahiyyətli səfiri professor Fadil Al-Şuveyli nəşr edilmiş kitabı yüksək qiymətləndirdi və bu cür təşəbbüslərin İraq və Azərbaycan arasında dostluq və qardaşlıq əlaqələrini daha da möhkəmləndirəcəyini vurğuladı. Mətbuat Şurasının sədri, kitabın ön sözünün müəllifi Əflatun Amaşov 150 illik İraq mətbuat tarixinin bu kitabda əks olunduğunu söyləyərək çoxsaylı dəyərli mənbələr əsasında əhəmiyyətli nəşr ərsəyə gətirildiyini qeyd etdi. Kitabı İraq jurnalistikasını öyrənmək üçün əsas ensklopedik nəşr adlandıran Mətbuat Şurasının sədri kitabın İraq mətbuatı ilə daha yaxından tanış olmaq istəyənlər üçün dəyərli mənbə olduğunu əlavə etdi. Şəmsəddin Kuzəçinin bir ziyalı olaraq fəaliyyətinin iki ölkə arasında əlaqələrin daha da möhkəmlənməsinə töhfə olduğunu əlavə etdi və yazıçıya yaradıcılığında uğurlar arzuladı.
Milli Məclisin V çağırış üzrə üzvü, Avrasiya Beynəlxalq Araşdırmalar İnstitutu İctimai Birliyinin sədri Qənirə Paşayeva ərəbdilli ölkələr arasında Azərbaycana ən yaxın və doğma ölkənin İraq olduğunu xüsusi vurğuladı. İstər jurnalistlik fəaliyyəti dövründə, istərsə də Milli Məclis üzvü kimi dəfələrlə İraqda olduğunu bildirən Qənirə Paşayeva orada 3 milyon soydaşımızın-türkmanların yaşadığını xatırlatdı: “Bizim ədəbiyyatımızın, şeirimizin böyük ustadlarından olan Məhəmməd Füzuli, böyük alimimiz Nəsrəddin Tusi məhz İraq torpağında uyuyur. Azərbaycan İraqla münasibətlərin yüksək səviyyədə olmasına çox önəm verir. İraq da bu əlaqələrin daha da inkişafına diqqət edir. Müharibədən əvvəl və sonra da İraqda olarkən ziyalılar, rəsmilərlə görüşlərdə onların Azərbaycana olan xoş münasibətin, iki ölkə arasında əlaqələrin inkişafında istəkli olduqlarının şahidi olmuşam. İndi iki ölkə arasında açılan aviareyslər də gediş-gəlişin, səfərlərin artmasına öz müsbət təsirini göstərir.”
İraq mətbuat tarixi ilə bağlı yazılmış bu kitaba, eləcə də Azərbaycan-İraq arasındakı dostluq əlaqələrinə və İraqda yaşayan soydaşlarımıza diqqət və həssaslıqla yanaşdıqları üçün iştirakçılara, Şəmsəddin Küzəçi başda olmaqla kitabda əməyi keçən şəxslərə və kitabın nəşr edilib ictimaiyyətə təqdim edilməsində Regional Hüquqi və İqtisadi Araşdırmalar İctimai Birliyinin rəhbəri Arzu Bağırovaya təşəkkür etdi. “Şəmsəddin bəylə bu kitab barədə söhbət edərkən Regional İqtisadi və Hüquqi Araşdırmalar İctimai Birliyinin sədri Arzu xanım onu nəşr və təqdimatını həyata keçirə biləcəyini söyləmişdi. Bu dəyərli təşəbbüsə görə təşəkkür edirəm. Kitaba Mətbuat Şurasının sədri Əflatun bəyin ön söz yazması ona ayrı bir daha anlamlı məna qatdı. Şəmsəddin bəyi uzun illərdir, tanıyıram. O, İraqla Azərbaycan arasında mənəvi körpülərin qurulması və gücləndirilməsində böyük əməyi olan ziyalılarımızdandır. Müntəzəm olaraq Azərbatcanın İraqda tanınması, oradakı soydaşlarımızın səsinin Azərbaycanda duyurulması üçün ziyalı, yazar olaraq bir çox işlər görüb. Ədəbi-mədəni əlaqələrin inkişafına töhfə verən layihələr bunlardandır. Sizi təbrik edirəm, hələ qarşıda yenə önəmli layihələr bizi gözləyir. Qeyd edim ki, Şəmsəddin bəy yeni kitab üzərində işləyir, ümid edirəm ki, onun da təqdimatına toplaşacağıq.”
Daha sonra çıxış edən kitabın redaktoru Azər Həsrət kitabın Azərbaycan mediası üçün əhəmiyyətini vurğuladı. Qeyd etdi ki, hər iki ölkə KİV-i arasında əlaqələrin intensivləşməsi və əməkdaşlıqların gücləndirilməsi olduqca önəmlidir.Kitabın digər redaktoru Atatürk Mərkəzinin şöbə müdürü, Dünya Gənc Türk Yazarlar Birliyinin Məsləhət Şurasının başqanı Əkbər Qoşalı, “Vektor” nəşriyyatının rəhbəri Elçin İsgəndərzadə, Azərbaycan-İraq Mədəni Əlaqələr İctimai Birliyi sədri Tahirə Məmmədova, kitabı türlkiyə türkcəsindən Azərbaycan türkcəsinə uyğunlaşdıran Əfsanə Ələsgərli və digərləri çıxış edərək kitabla bağlı fikirlərini bildirdilər. Sonda kitabın ərsəyə gəlməsində əməyi keçən şəxslərə, RHİM sədri Arzu Bağırovaya, millət vəkili Qənirə Paşayevaya və Kərkük Kültür Dərnəyinin rəhbəri dr. Şəmsəddin Kuzəçiyə İraqın Azərbaycandakı fövqəladə və səlahiyyətli səfiri professor Fadil Al-Şuveyli təşəkkürnamə təqdim edib. Kərkük Kültür Dərnəyinin rəhbəri dr. Şəmsəddin Kuzəçi də kitabın hazırlanlamsı, çapı, təqdimatı və dərnəyə hər zaman dəstəyinə görə millət vəkili Q.Paşayevaya, RHİM sədri Arzu Bağırovaya Kərkük Kültür Dərnəyi adından plaket və xidmət ödülü, Atatürk Mərkəzinin şöbə müdürü, Dünya Gənc Türk Yazarlar Birliyinin Məsləhət Şurasının başqanı Əkbər Qoşalıya, kitabı türlkiyə türkcəsindən Azərbaycan türkcəsinə uyğunlaşdıran Əfsanə Ələsgərliyə, kitabın redaktoru Azər Həsrətə, Mətbuat Şurasının sədri Əflatun Amaşova, Azərikitab rəhbərliyinə isə təşəkkürnamə təqdim edib. Daha sonra müəllif kitabı oxucuları üçün imzaladı.
Zərifə BƏŞİRQIZI,
“Xalq qəzeti”